Zëra korridoreve politike e mediatike flasin për skenare të ndryshme me protagoniste Partinë Demokratike, forca politike më e madhe opozitare në vend. Teksa përçarja mes 2 grupeve brenda kësaj force ka arritur kulmin e saj dhe ish-kryeministri Sali Berisha është shprehur i vendosur për të mos bashkëpunuar me Enekelejd Alibeaj, në dorën e të cilit mbetet vula dhe sigla e PD, demokratëve do u duhet të hynë të ndarë në zgjedhje, ku rezultati duket se do të jetë si ai i 6 marsit. Një vendim që për shkak të kokëfortësisë të dy drejtuesve të dy pjesëve të PD, dikush në emër të gjykatë, e dikush të shumicës së anëtarësisë, po i shërben Edi Ramës për të mbajtur nën kontroll, nëse jo të gjitha bashkitë, pjesën dërrmuese të tyre, sikundër ndodhi më 6 mars, ku nga 6 bashki në garë, demokratët arritën të merrnin vetëm 1. Në të tillë situatë, me të drejtë ngrihet pyetja, a është e gjitha një tekë personale, apo një mision, qoftë nga njëra e qoftë nga tjetra palë.
Nëse do t’i referohemi historikut të Partisë Demokratike, do të shohim se ish-kryeministri Sali Berisha, në momente kyçe për fatin e PD, ka ditur të bëjë marrëveshje edhe me ata që i ka patur kundërshtarë si brenda ashtu edhe jashtë partisë. Një rast i tillë është edhe me Genc Pollon, i cili dalë nga gjiri i PD krijoi një parti të re, me emër thuajse të njëjtë. Edhe në rastin aktual, ish-kryeministri Sali Berisha, pas vendimit të Gjykatës së Shkallës së Parë, të parëve që u shtriu dorën ishin Enkelejd Alibeaj e Gazment Bardhi. Pas një sërë përplasjesh me deklarata, por edhe fizike më 8 janar, Berisha duke i veshur përgjegjësinë për të gjithë situatën e krijuar Lulzim Bashës, i cili më 21 mars 2022 dha dorëheqjen, u shtriu dorën 2 ‘dishepujve’ të këtij të fundit. Një dorë që u kthye mbrapsht bosh, me vendimin e Enkelejd Alibeajt, i cili në cilësinë e nënkryetarit dhe kryetarit të komanduar do të animonte vendimin e dhënë nga gjyqtari Agron Zhukri. Vendim ky që erdhi si përgjigje për ftesën e bërë nga ish-kryeministri, për të lënë pas gjithçka pas e për t’u bashkuar. Pavarësisht thirrjeve për të marrë pjesë në procesin e riorganizimit të të gjitha strukturave, Alibeaj si kryetar me autorizim nga Lulzim Basha, nuk pranoi teksa arsyetohej se çështja është në Apel. Ishte kjo e fundit që e mbajti pezull gjithçka, për të ardhur në vendimin e 3 marsit, ku vendosi prishjen e vendimit të Zhukrit dhe kthimin për shqyrtim të kësaj çështje, vendim ky i konsideruar gjerësisht si politik.
Nga ana tjetër, Enkelejd Alibeaj duket i prerë për të mos bashkëpunuar me ish-kryeministrin, qëndrim ky konsistent dhe i justifikuar me faktin e ‘non gratas’. Por sa i sinqertë është ky qëndrim. Enkelejd Alibeaj, ka qenë një nga prurjet e vetë ish-kryeministrit Berisha, duke e emëruar në postet më të të larta, përfshi edhe si pjesë të kabinetit të tij qeverisës. Gjatë periudhës 2007-2009, Alibeaj ishte ministër i Drejtësie, teksa tashmë duket se është kthyer në një armik të përbetuar të Berishës, pas Lulzim Bashës. Edhe pse nënkryetarët e tjerë, apo edhe vetë Sekretari i Përgjithshëm Gazment Bardhi është shfaqur më i rezervuar në qëndrime, qoftë kjo për shkak të anëtarësisë, kjo nuk ka ndodhur me Enkelejd Alibeaj, i cili duket se flet me gjuhën e Lulzim Bashës.
Kur situata shfaqet mëse e koklavitur, Enkelejd Alibeaj, në një konferencë me gazetarët pas përfundimit të mbledhjes së grupit parlamentar dhe kryesisë së partisë nga zyrat e reja, u ndal tek mbajtja e përgjegjësisë, kur u pyet për një gjë të tillë pas 14 majit, për të cilin nuk u shpreh shumë optimist.
‘Një nga elementet që besoj unë është i rëndësishëm në politikë për ta injektuar aq sa mundet është mbajtja e përgjegjësisë nga kushdo. Duhet të jeni të bindur ju, se edhe në këtë situatë të vështirë nga ne, po do të japim shembuj sesi mbahet përgjegjësia, sesi bëhet politikë ndryshe, sesi nuk spërdridhet fjala. Nëse ja vlen të bëjmë këtë, ia vlen gjithçka’, u shpreh Alibeaj përpara gazetarëve.
Një qëndrim korrekt, por që ndryshon nëse vihet në kontekstin e atyre zërave të korridoreve që përmendëm shkarazi. Në këtë rast, gjithçka ndryshon dhe vjen si një mision, ku Alibeaj nuk hyn në zgjedhje për të fituar, por për të rikthyer Lulzim Bashën.
Këto zëra flasin se rezultati i zgjedhjeve të 14 majit me një Parti Demokratike të ndarë si mos më keq, do të bëjë Alibeajn të japë dorëheqjen e njëkohësisht një gjë e tillë do të pritet edhe nga ish-kryeministri Sali Berisha. Edhe pse ky i fundit është shprehur për marrje përgjegjësie, sërish Statuti i 11 dhjetorit nuk e detyron të largohet, por të kalojë në votëbesim. E nga ana tjetër, largimi i Alibeajt pritet të rikthejë Lulzim Bashën, i cili do të shpresojë që me një Berishë ‘të plagosur rëndë’ nga rezultati që mund të japë 14 maji për një PD të përçarë, dhe me anëtarësinë e zhgënjyer pas një tjetër humbje, të hyjë në zgjedhje për të rimarrë kreun e partisë, edhe me mbështetjen e ndërkombëtarëve. Tërheqja totale publike e Lulzim Bashës që prej 21 marsit, merret si një akt përgjegjësie, dhe si i tillë përflitet edhe rikthimi i tij, në kushtet e një PD-je të dërrmuar në zgjedhjet lokale.
Dalja me kandidat edhe në Tiranë, për të dëmtuar kandidatin e primareve, vjen si hap i parë i plotësimit të këtij skenari.
Por për të parë nëse këto zëra e skenarë korridoresh dhe jo vetëm, do të rezultojnë të suksesshëm duhet pritur 15 maji, edhe pse vetë Lulzim Basha sot gjeti alibinë e humbjes së mundshme në zgjedhje, njëherësh edhe të rikthimit të tij.
