Një nga mega-aferat që opozita akuzon kryeministrin Edi Rama dhe qeverinë e tij është ajo e portit të Durrësit. Ndërtimi i “Dubai Yacht Marina” në portin e qytetit tonë bregdetar ngre shumë pikëpyetje lidhur projektin. Si gjithmonë Rama i paraqet plot pompozitet këto projekte me idenë e modernizimit të vendit, por sa transparent është ai në këto “mega-projekte”?
Në dhjetor 2020, një marrëveshje bashkëpunimi mes qeverisë shqiptare dhe Emirateve të Bashkuara kaloi në Kuvend për të marrë miratimin.
Viti 2021 do të niste me lajmet e bujshme sesi kompania më e madhe që transformoi Dubain, EMAAR, do të zbatonte projektin e Durrësit.
Investimi 2.1 miliardë euro në rreth 80 hektarë (800 mijë m2) tokë rreth Portit të Durrësit ashtu siç pritej, ka ndezur debate të ashpra që në fillim mes përfaqësuesve të mazhorancës dhe opozitës, si në parlament, nëpër komisione e deri në rrjetet sociale. Në fillim u paraqit si një investim strategjik i kompanisë së famshme Nga Emiratet e Bashkuara Arabe, “Emmar”.
Nga njëra anë deputetët demokratë e konsiderojnë këtë projekt si mega-vjedhje dhe aferën korruptive më të rëndë në historinë e Shqipërisë. Akuzave iu janë bashkuar dhe dy liderët e opozitës Ilir Meta dhe Sali Berisha, të cilët fajësuan kryeministrin Edi Rama, i cili qëndron pas këtij projekti mafioz duke e akuzuar për pastrim parash.
Lideri i Partisë së Lirisë, Ilir Meta premtoi se disponon dokumenta për të çuar para drejtësisë shefin e qeverisë. Përfaqësuesit e qeverisë premtuan se ky projekt është realizuar me garë të hapur, transparent dhe do të akumulojë 1 miliard euro të ardhura si dhe të garantojë 12 mijë vende pune. Për opozitën, nëse inceneratorët është vjedhja e shekullit, kjo është vjedhja më e madhe e historisë.
Sipas akuzave qeveria ka mashtruar për aksionerët dhe investitorët e Portit të Durrësit, pasi rezulton se përfitues të aksioneve fundore të këtij projekti janë Muhammadal Alabbar dhe familja e tij. Kjo është skandaloze që qeveria shqiptare jep një pasuri të tillë strategjike një familjeje për biznes.
Në projekt nuk ka as ‘Emaar’ as princ kurore siç mashtronte publikisht Edi Rama, por është vetëm familja Alabbar. Skema e përdorur është thuajse identike me atë të inceneratorëve, marrëveshje me individë dhe kompani të sapokrijuara pa asnjë historik financiar.
Një tjetër gjë që bie në sy është se investitori që do të zhvillojë projektin e “Durrës Yachts & Marina” do të përjashtohet nga pagesa e taksës së infrastrukturës dhe ajo e strehimit social.
Shenim: *Ky është artikull ekskluziv i Gazeta Telegram, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Gazeta Telegram”.
