Shqiptarët janë ndër popujt më të palumturit në Europë. Në raportin e përvitshëm të Lumturisë, të publikuar nga Organizata e Kombeve të Bashkuara, Shqipëria ka humbur një pozicion, duke u renditur në vendin e 83 nga 146 shtete gjithsej. Vendi ynë lë pas Maqedoninë e Veriut , Turqinë dhe Gjeorgjinë. Serbia, renditet në vendin e 47-te. Ne renditjen globale, dominojnë vendet nordike.
Për të gjashtin vit radhazi, Finlanda është vendi më i lumtur në botë, sipas renditjes së Raportit të Lumturisë Botërore. Vendi nordik dhe fqinjët, Danimarka, Islanda, Suedia dhe Norvegjia të gjitha renditen ne krye te listës.
Raporti i Lumturisë i cili është një botim i Rrjetit të Zgjidhjeve të Zhvillimit të Qëndrueshëm të OKB-së bazohet në një anketë vjetore, ku pyeten rreth 1000 individë në rreth 150 vende të botës, të cilëve iu kërkohet që të rendisin, nga 1 në 10, për të parë nëse janë duke jetuar mirë apo jo.
Vendet renditen sipas lumturisë bazuar në vlerësimet mesatare të jetës së tyre gjatë tre viteve te kaluara.
Treguesit në të cilët bazohet raporti, bazohen në të ardhurat për frymë, pritshmërinë për një jetë të shëndetshme, mbështetjen nga miqtë dhe të afërmit, liria për të bërë zgjedhje në jetë dhe nivelet e perceptuara të korrupsionit.
Studiuesit thonë se ka arsye për optimizëm në raportin e fundit mbi lumturinë botërore. Treguesi për mirësinë dhe dashamirësinë është rreth 25% më e lartë se sa ishte para pandemisë.
Lumturia globale nuk është goditur në tre vitet e pandemisë Covid-19. Vlerësimet e jetës nga 2020 deri në 2022, kanë qenë “jashtëzakonisht elastike”, thotë raporti.
Mesataret globale janë në përputhje me tre vitet para pandemisë. Edhe gjatë këtyre viteve të vështira, emocionet pozitive kanë mbetur dy herë më të larta, se ato negative dhe ndjenjat e mbështetjes pozitive sociale, janë dy herë më të forta se ato të vetmisë. Sa i përket Shqipërisë, pagat e ulëta, emigrimi i të rinjve, varfëria ishin ndër arsyet se përse qytetarët ishin të pa lumtur.
