Kuvendi i dha të hënën dritën jeshile SPAK për arrestimin e ish ministrit Arben Ahmetaj. PD e PS vendosën në Këshillin e Mandateve që t’i kërkojë Kuvendit të japë autorizimin që kërkon, fillimisht për kontrollin e banesës së ish ministrit e më pas arrestimin e tij. Opozita prezantoi dhe dorëzoi Raportin në Këshillin e Mandateve që miraton kërkesën e SPAK për arrestimin e Ahmetajt.
Por Arben Ahmetaj, është i radhës në serinë e arrestimeve të bëra nga brenda Partisë Socialiste. Një serial ku në sezonin e parë pamë për herë të parë arrestimin e një peshku të madh, atë të Lefter Kokës.
Lefter Koka
Ish-ministri i Mjedisit i Shqipërisë, Lefter Koka, u arrestua më 14 dhjetor 2021, me akuza për disa vepra penale në lidhje me hetimet për procedurën mbi kontratën e koncesionit për ndërtimin e impiantit të trajtimit të mbetjeve urbane dhe prodhimit të energjisë në Qarkun e Elbasanit.
Prokuroria e Posaçme kundër Korrupsionit dhe Krimit të Organizuar Tiranë ka njoftuar se dyshohet se Koka ka konsumuar veprat penale “shpërdorimi i detyrës”, kryer në bashkëpunim, “korrupsioni pasiv i funksionarëve të lartë shtetërorë ose i të zgjedhurve vendorë”, si dhe “pastrimi i produkteve të veprës penale apo i veprimtarisë kriminale” , kryer në bashkëpunim.
Koka ka mbajtur postin e ministrit të Mjedisit në qeverinë e Shqipërisë në vitet 2013-2017.
Saimir Tahiri
Më 4 shkurt të vitit të kaluar, Apeli i GJKKO la në fuqi vendimin e Krimeve të Rënda për ish-ministrin e Brendshëm Saimir Tahiri, por ndryshe nga vendimi i parë, Tahirit iu hoq mundësia për konvertimi i dënimit në shërbim prove. Sipas vendimit të gjykatës u tha se ai do ta vuaj dënimin në një burg të zakonshëm 3 vite dhe 4 muaj burgim.
Pas vendimit të GJKKO u firmos dhe urdhri i arrestit nga prokurorët dhe ish-ministri, Saimir Tahiri ka dalë me pranga në duar nga gjykata dhe është dërguar në ambientet e paraburgimit të Burgut 313.
Megjithatë 20 muaj para përfundimit të dënimit ky i fundit u lirua nga burgu.
Gjykata e argumentoi lirimin e tij të premten, më 2 qershor, me një raport të Institutit të Mjekësisë Ligjore, ku theksohej se bashkëshortja e ish-ministrit të Brendshëm, për shkak të problemeve shëndetësore, nuk mund të kujdeset për dy fëmijët e çiftit.
Dënimin e mbetur, pasi vuajti 16 muaj heqje lirie, Tahiri do ta kalojë në shtëpi dhe sipas vendimit të Gjykatës, ai mund të lëvizë nga banesa vetëm “për plotësimin e nevojave të domosdoshme familjare, kur Shërbimi i Provës është dakord”.
Vangjush Dako
Më 6 qershor të këtij viti Vangjush Dako, ish kryebashkiaku i Durrësit u arrestua me urdhër të SPAK së bashku me 8 zyrtarë dhe ish zyrtarë të bashkisë së Durrësit si dhe 1 ndërtues.
Gjyqtari i Gjykatës së Posaçme kundër Krimit dhe Korrupsionit, Erjon Bani, firmosi urdhërarrestet e lëshuara nga SPAK. Ndaj Vangjush Dakos, 4 ish zyrtarëve të Drejtorisë së urbanistikës së Bashkisë së Durrësit, dhe ish Drejtorin Adhurim Qehajaj, pronarin e një kompanie ndërtimi, Fiqiri Farruku, u caktua masa e sigurisë “arrest me burg”, ndërsa për tre nëpunëse gra u vendos masa e ‘arrest shtëpie’.
Rasti i parë i shpërdorimit të detyrës ka të bëjë me dhënien e një leje ndërtimi në 2011 për një pallat, në lagjen nr 5,në qendër të Durrësit dhe që u dëmtua nga tërmeti i 2019.
Rasti i dytë i shpërdorimit të detyrës ka të bëje me një kallëzim për tenderin e shëtitores që sipas Kontrollit të Lartë të Shtetit dëmi llogaritej në 18 milionë lekë. Tenderi bëhet fjalë se është realizuar në vitin 2014 – 2015, me vlerë 22 mln lekë.
Arben Ahmetaj
SPAK ka dhënë një urdhër-arresti për Arben Ahmetajn i cili ndodhet aktualisht jashtë vendit dhe nuk pranon të vijë pa dalë e vërteta tamam.
Aleatin e tij të dikurshëm duket se Rama tashmë e ka lëshuar, ku në një konferencë për shtyp tha se kushdo është i barabartë para drejtësisë, pra la të kuptohej që ai nuk i hynte më në punë.
