Mjekët, infermierët dhe së fundmi farmacistët janë duke braktisur Shqipërinë, për t’u punësuar në vendet e Bashkimit Evropian, kryesisht në Gjermani. Kjo është dhe një nga arsyet se përse studentët zgjedhin degët e mjekësisë.
Organizatat ndërkombëtare e kanë nxjerrë vazhdimisht në pah problemin nëpërmjet raporteve të tyre, por shifrat tregojnë që epidemia e braktisjes së sistemit shëndetësor duket thuajse e pamundur për t’u ndalur, për shkak edhe të pagave të larta që ofrojnë vendet e BE-së. Sipas Federatës së Mjekëve Shqiptarë në Evropë, në 10 vitet e fundit janë larguar nga vendi 3.800 mjekë, ndërsa vetëm në vitin 2022, janë larguar 75 farmacistë.
Kriza është ndjerë më së shumti në zonat e thella rurale dhe fshatrat, ku në shumicën e Qendrave Shëndetësore, punën e mjekut e bëjnë infermierët, ndërsa këta të fundit, zëvendësohen nga veterinerët e zonës. Këta të fundit, në mënyrë vullnetare, japin ndihmesën në komunitet, në matjen e tensionit, aplikimin e gjilpërave dhe serumeve. Problematika ndodh në disa qarqe të vendit, por më evidente është në Shkodër, Berat, Lezhë e Dibër.
Jo vetëm në zonat e thella dhe rurale, por edhe zonat turistike si në bregdet, vuajnë nga mungesa e shërbimit. Rasti flagrant është në Spille. Edhe pse një zonë turistike, Qendra Shëndetësore e fshatit bregdetar, u mor përsipër nga një fondacion zviceran, por aktualisht është e mbyllur për shkak të mungesës së stafit. Ashtu siç ndodhi edhe vitin e kaluar ku mungesa e theksuar e mjekëve detyroi Ministrinë e Shëndetësisë dhe Mbrojtjes Sociale të kontaktojë mjekët e dalë në pension për të punuar në këto zona apo dhe disa mjekë të sapo diplomuar, por tashmë kriza duket se është më e thellë.
Kjo mungesë e theksuar e stafit mjekësor, e sidomos e infermierëve siç e thamë, ka detyruar që veterinerët të bëjnë punën e tyre në shumë zona duke matur tensionin, duke bërë injeksione dhe terapi të ndryshme të detyruar nga nevoja, por duke marrë përsipër edhe një përgjegjësi për jetën e pacientëve që tashmë nuk gjejnë dot shërbim tek mjekët dhe infermierët, por tek veterinerët.
Shenim: *Ky është artikull ekskluziv i Gazeta Telegram, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Gazeta Telegram” .
