Partia Socialiste erdhi në pushtet në vitin 2013, me shumë premtime të bëra në fushatë dhe me shpresën, se gjërat do të merrnin një kthesë tjetër për vendin pas viteve plot tranzicion. Shëndetësia falas, prodhimi i naftës vendase, rritja e pagave, ishin disa nga premtimet, që ende sot, konsiderohen nga qytetarët si të pa realizuara.
Për të mos mjaftuar, anëtarët e qeverisë dhe personat e konsideruar si të afërt e kryeministrit Rama, zbuloheshin se ishin të përfshirë në afera. Vetë kryeministri, ndiqte sloganin “Të vetëm përpara drejtësisë”. Ky slogan, u vu në zbatim fillimisht me ish-ministrin e Brendshëm, Saimir Tahiri. Ai ishte një nga njerëzit më të afërt të kryeministrit Rama dhe njeriu që drejtoi një dikaster që korri suksese, një ndër to konsiderohet mësymja në Lazarat dhe asgjësimi i parcelave me kanabisi në fshatin e njohur kudo në Evropë dhe më gjerë. Tahiri doli në disa audiopërgjime italiane si i përfshirë në trafik narkotikësh.
Në fakt, emri i tij përmendej nga grupi Habilaj, që ishin kushërinj të largët me ish-ministrin. Dyshohej se ky grup kriminal lëvizte me makinën e Tahirit dhe jo në pak raste ka dalë përtej kufirit. Gjithashtu, ish-ministri akuzohet nga gjykata se ka pranuar dhurata dhe ka shpërdoruar detyrën në kohën që ka qenë në detyrë, dënim, që është duke e vuajtur ende. Por kryeministri, vendosi të mos mbronte njeriun e afërt, por ndoqi parullën “I vetëm përpara drejtësisë”. Ndërsa togfjalëshi i Tahirit, “s’keni parë gjë akoma”, u kthye në një rrezik për qeverinë. Ai u zëvendësua në detyrë nga Fatmir Xhafaj. Kjo detyrë e re e Xhafajt s’do të kalonte pa u bërë pjesë e debateve të skakierës politike. Vëllai i tij, dyshohej si i përfshirë në trafikim lëndësh narkotike dhe prostitucioni. Pas muajsh debate dhe faktesh kundra të prezantuara nga opozita dhe pro nga mazhoranca, ai zgjodhi të jepte dorëheqjen, që u votua edhe nga kolegët e tij në Parlament.
“Dënimi” i Ramës për Xhafajn ishte përfshirja në listat zgjedhore në numrin 22, e konsideruar si jo fituese. Por, formula e re e zgjedhjeve i dha avantazhin Xhafajt të thyente herësin dhe të zinte një vend në parlamentin shqiptar. Sot ai, zgjedh të jetë një zë kritike ndaj qeverisë aktuale, edhe pse është pjesë e tyre. Janë edhe tre emra të përfshirë, që kanë emërues të përbashkët aferën e inceneratorëve. Ish-ministri i Mjedisit, Lefter Koka, ishte një rekrutim i bujshëm i Partisë Socialiste në zgjedhjet parlamentare të 2021. Ai vinte nga Lëvizja Socialiste për Integrim, një figurë me mbështetje të gjerë në popullatë në Qarkun e Durrësit. Kjo u dëshmua në zgjedhje, ku arriti të siguronte mijëra vota personale. Por, Koka nuk mundi të zinte një vend në parlament në radhët e Partisë Socialiste. Ai dha dorëheqjen nga mandati i deputetit ende pa nisur sesioni i ri parlamentar. Disa kohë më pas, ai u arrestua si i akuzuar në aferën e inceneratorëve. Edhe në këtë rast, kryeministri Rama reagoi prerazi duke thënë: “Përgjegjësia është individuale, të vetëm përpara drejtësisë”. Sot Koka, është duke vuajtur dënimin dhe nuk ka përfituar zbutje, edhe pse ka depozituar herë pas here kërkesa për shkak të gjendjes së rënduar shëndetësore.
Fat të ngjashëm kishte edhe ish-deputeti Alqi Bllako. Bllako ashtu si Koka, erdhi nga radhët e LSI. U përfshi në listën e Tiranës dhe arriti të merrte mandatin e deputetit. U arrestua shumë shpejt si një nga të përfshirët në aferën me dëm disa milionësh të inceneratorëve. Por edhe për Bllakon, që Rama e trumbetonte si një djalë të sjellshëm dhe me ambicie dhe që përçonte zërin e qytetarëve, kryeministri mbajti të njëjtin qëndrim: “Të vetëm përpara ligjit”. Rasti, që mund të cilësohet si dhe më flagranti është ai i Arben Ahmetajt.
Ky i fundit ka mbajtur poste të rëndësishme në 2 qeveritë Rama. Fillimisht ai ishte Ministër i Financave dhe Ekonomisë, më pas i Rindërtimit dhe së fundmi zv. kryeministër. Rama shpesh e ka lëvduar për punën e bërë, si nëpërmjet deklaratave publike, por edhe privatisht, konfirmuar këto nga vetë Ahmetaj. Por sot, Ahmetaj është “zhveshur” nga çdo post politik. Ai ende gëzon mandatin e deputetit, por duket se marrëdhënia e tij me kryeministrin është futur drejt një rruge pa kthim. Ai dyshohet si njeriu që ka dorëzuar dokumentet për inceneratorët personave në Lëvizjen Socialiste për Integrim (Asokohe, sot njihet si Partia e Lirisë) dhe emri i tij është lakuar si pjesë e takimeve sistematike me një nga personat që rezulton pronar i inceneratorëve, Klodian Zoto. Por edhe për këtë rast, kryeministri Rama tha se “përgjegjësia është individuale”, ndërsa Ahmetaj e shigjetoi duke thënë :”Ndiqni paratë dhe zbuloni kokën e aferës së inceneratorëve”.
