Skandalet në qeverinë Rama nuk kanë të sosur dhe po ashtu lakohen emra të rinj, të konsideruar peshq të mëdhenj, që mund të bien në rrjetën e SPAK dhe pse jo prapa hekurave.
Pas Lefter Kokës, Saimir Tahirit, Vangjush Dakos e Arben Ahmetajt, po përflitet edhe emri i Damian Gjiknurit që mund të jetë i “lëshuari” i radhës nga Rama.
Në të gjithë këtë gjullurdi ndërrimi postesh ministrash, deputetësh, sekretarësh të përgjithshëm e drejtorë qarqesh, vetëm një duket që i ka mbizotuar viteve, edhe pse jo pak herë e përfolur për probleme në dikasterin që drejton.
Ogerta Manastirliu shërben si ministre e Shëndetësisë dhe Mbrojtjes Sociale që nga viti 2017. Prej vitit 2017 është pjesë e Grupit Parlamentar të Partisë Socialiste, si deputete e Qarkut të Tiranës në Kuvendin e Shqipërisë ndërsa në zgjedhjet e 25 prillit 2021 është zgjedhur deputete e Qarkut të Tiranës në Kuvendin e Shqipërisë.
Por ndoshta jo shumë prej nesh dinë për karrierën e Manastirliut para se kjo e fundit të bëhej ministre, post që tashmë e mban prej 6 vitesh.
Në vitin 2004 ajo ka nisur karrierën profesionale në Bashkinë e Tiranës, fillimisht në Drejtorinë e Koordinimit të Projekteve. Gjatë viteve 2005-2011, ka drejtuar Drejtorinë e Strehimit dhe Shërbimit Social. Në këtë detyrë, Manastirliu ka qenë një nga kontribueset kryesore në hartimin dhe vënien në zbatim të “Strategjisë Lokale të Strehimit Social”.
Në periudhën 2011-2013, ajo është angazhuar si eksperte për menaxhimin dhe koordinimin e politikave sociale dhe burimeve njerëzore për organizata të ndryshme kombëtare dhe ndërkombëtare, si UNFPA, Friedrich Ebert Stiftung etj. Ndërsa në 4 vitet që pasuan Manastirliu ka drejtuar Qendrën Spitalore Universitare “Nënë Tereza” në Tiranë.
Pavarësisht premtimeve në dukje utopike për shëndetësi falas, ky sektor nuk është se ka shkëlqyer nën dirigjimin e Manastirliut.
Korrupsioni vijon hapur në spitalet shtetërore shqiptare si dhe nuk mungojnë denoncimet nga radhët e opozitës dhe jo vetëm për koncesionet e dyshimta.
Ogerta Manastirliu është ministrja e Shëndetësisë më jetëgjatë në këtë detyrë pas vitit 1990 në Shqipëri.
