Që nga mbrëmja e 21 Tetorit, kur dhëndri i Sali Berishës u arrestua në Rinas dhe kur vetë Berishës iu kërkua sekuestrimi i pasaportës me masën e sigurisë “detyrim paraqitje”, kryeministri Edi Rama ka preferuar të mbajë distancë nga ngjarja dhe nuk ka thënë asnjë fjalë për të.
Postimet e tij në rrjetet sociale janë kryesisht etyde nga bukuritë natyrore, apo ndonjë pamje me dron nga projektet e kantiereve për rrugët e reja.
Të nesërmen që Berisha u vu nën masë sigurie, Rama u shfaq në Krujë. Aty inspektoi pallatet për të dëmtuarit nga tërmeti në krah të Belinda Ballukut.
Krejt indiferent nga zhvillimet në Tiranë, kryeministri u duk i preokupuar për suvatimin e pallateve, për instalimet elektrike apo kalldrëmet mes godinave.
Kjo heshtje e sforcuar e Ramës mbi një ngjarje për të cilën gumëzhin gjithë Shqipëria, nuk është rastësi.
Së pari, tentohet që të shmanget dimensioni politik i goditjes së liderit të opozitës nga institucionet e drejtësisë, për të mohuar idenë se ky është një proces politik. Qëllimi është ta lërë Berishën përballë prokurorëve dhe gjykatësve duke u dhënë sa më pak krahë hamendësimeve se procesi është një ndeshkim i pushtetit për liderin e opozitës.
Por heshtja e kryeministrit Rama ka edhe një shpjegim tjetër.
Qëllimi është që t’i jepet hapësirë idesë se goditja nuk i erdhi Berishës nga Partia Socialiste, por nga ambasada amerikane.
Kjo ide u përforcua edhe përmes disa takimeve që socialistët kanë bërë këto ditë me ish-ambasadoren Juri Kim në Washington.
Ditën që gjykata vendosi masën e sigurisë për Berishën, kryebashkiau i Tiranës Erjon Veliaj ishte në Shtetet e Bashkuara të Amerikës për një takim me Juri Kim. Ai la të kuptohet se ajo po i ndiqte zhvillimet në Shqipëri. “Yuri Kim ka të drejtë kur thotë” – citoi Veliaj: “Ti mund të largohesh nga Shqipëria, por Shqipëria nuk largohet kurrë nga ty”.
Për ta përforcuar më shumë idenë se procesi ndaj Berishës është “Made in USA”, udhëtoi drejt Shteteve të Bashkuara edhe ministrja e shtetit Elisa Spiropali. Edhe ajo takoi ish-ambasadoren Juri Kim, të cilën e falenderoi “për mbështetjen e çmuar që ka dhënë gjatë misionit të saj të suksesshëm në Tiranë në forcimin e marrëdhënieve midis dy vendeve tona”.
Por indiferenca e Ramës, lënia e stafetës për goditjen e Berishës në duart e prokurorëve dhe gjyqtarëve apo risjellja në skenën politike të mesazheve te Juri Kim nuk e lë jashtë procesit Edi Ramën.
Ajo ngjan me shume si një lojë kukafshehti me publikun, po të kujtojmë një fakt të thjesht. Kallëzimi në prokurori për privatizimin e kompleksit Partizani mban firmën e Partisë Socialiste.
Në nëntor të vitit 2020 ishte Taulant Balla në funksionin e Kryetarit të grupit parlamentar të Partisë Socialiste që dorëzoi kallëzimin në SPAK për Berishën dhe familjarët e tij duke inicuar hetimet.
Jo shumë larg në kohë, por në qershor të këtij viti, Taulant Balla ishte në SPAK për të njëjtën dosje, ku bisedoi për 3 orë me prokuroren Enkelejda Millonai për hetimet.
