Kryeministri Edi Rama e ka nisur këtë fushatë në mënyrën më “moderne” të mundshme. Më shumë se sa për të premtuar projekte dhe duke u bazuar në një program se çfarë do të bëhet me qytetet për 4 vitet e ardhshme, është i fiksuar si e si të bëjë sa më shumë klikime. Duket se epoka e internetit, instagramit dhe Tik-Tokut e ka infektuar edhe politikën, dhe Rama po mundohet ta shfrytëzojë më së miri.
Nuk i mjaftoi Podcasti që hapi ku bën intervistat e tij, por habiti edhe me këngën që zgjodhi për fushatë zgjedhore. Një këngë tallava që rrëmbeu për ditë me radhë vëmendjen nga fushata e vërtetë e që u diskutua e stërdiskutua nëpër emisione televizive.
Sigurisht nuk kishte si mos ta shoqëronte këtë këngë me një kërcim përtej kufijve të normales në një takim me banorët e Kamzës. Ja një lëvizje tjetër që e hoqi vëmendjen nga esenca e vërtetë e zgjedhjeve, ajo e kërkesës së llogarisë nga populli për punët që duhen bërë.
Kërcimin duket se e ka bërë pjesë të strategjisë për fushatën e tij këtë herë, pasi nuk munguan as tundjes e kryeministrit në qytetin e Elbasanit. Patjetër duke ironizuar dhe opozitën dhe duke bërë pjesë të ligjëratave të tij, faktin që të djathtët janë kapur me tallavanë e Ramës.
“Ata tallavasë i marrin të keqen. A thua se po dëgjojnë gjithë ditën Mozzartin. Këta rrinë dhe dëgjojnë gjithë ditën se çfarë del nga zorra qorre dhe pastaj bezdisen nga ritmi i një kënge. Kjo meriton në përgjigje me Tit Vullkanin. Fushata dhe rruga drejt 14 Majit duhet të jetë me nota të rëndësishme shprese dhe vështrimi nga e ardhmja”, tha Rama.
Duke qenë se po bëhet shumë gjatë në pushtet, ai mundohet që në çdo fushatë të gjejë një model të ri, të krijojë perceptimin se ne jemi ndryshe në çdo fushatë. Mesa duket tani ka zgjedhur të tregohet modest, kokulur, në një farë mënyre mundohet të krijojë idenë që këto janë zgjedhje lokale, nuk u jep rëndësinë e duhur.
Tallja e Ramës nuk përfundon me kaq, mjafton të shohësh posterat e vendosur nëpër billboards rrugëve të Tiranës dhe jo vetëm. Veten e shfaq me ngjyra, ndërsa dyshen kundërshtare Berisha-Meta në gri e kokëulur.
I shfaq ata sikur të ishin dy të dënuar, të penduar të drejtësisë apo dhe si të tërhequr zvarrë. Diçka e tillë mjafton që KQZ të reagojë dhe të marrrë masat për t’i hequr nga rruga këto grafika “horror”.
