Zgjedhjet lokale të 14 majit 2023 po futen drejt një procesi të pazakontë në disa drejtime. E para ka të bëjë me situatën e brendshme të Partisë Demokratike, ku Gjykata e Apelit i dha të drejtën e vulës përkohësisht grupimit të Enkelejd Alibeajt, ndërsa Sali Berisha, i cili pretendon se ka shumicën në parti, i ka varur shpresat te KQZ. Kjo e fundit u shpreh sot, se në perceptimin individual të kreut të saj, Ilirjan Celibashi, kryetari është Sali Berisha, por me ligj, vula mbetet te Lulzim Basha, i cili figuron ende si kryetar i PD. Këtij të fundit, iu dha 48 orë kohë që të paraqesë një përpilim të ri aplikimi, në mënyrë që të regjistrohen në zgjedhje.
Alibeaj së fundmi ka bërë thirrje për bashkim mes demokratëve, duke lënë si kandidatë për zgjedhje, emrat e dalë nga primaret, por oferta e tij, s’i ka joshur mbështetësit e Berishës. Me gjasë, ata do të regjistrohen në zgjedhje me siglat e aleatëve, si Partia e Lirisë (Drejtuar nga Ilir Meta) apo Partia Drejtësi Bashkimi i të Drejtave të Njeriut (Drejtuar nga Vangjel Dule). Nga ana tjetër, kampi socialist, është me ide më të qarta, edhe pse nuk i kanë bërë ende publikë emrat e kandidatëve për kryetar bashkish, apo këshillat bashkiakë.
Në një dalje për mediat, kryeministri Edi Rama tha se 25 marsi, do të jetë dita kur do të publikojnë emrat e kandidatëve. Ai konfirmoi se pak a shumë, do të rikonfirmohen kandidatët aktualë për kryetar bashkish. I pari, që është konfirmuar nga Rama, është kryebashkiaku i Shijakut, Elton Arbana. Konfirmimi i tij ka ardhur disa muaj më parë nga vetë kryeministri, i cili e shpalli si “kampionin” e menaxhimit të fondeve të rindërtimit, për pasojat e lëna pas nga tërmeti i nëntorit të 2019-s. Burime në kampin rozë, bëjnë me dije se Rama do të rikonfirmojë rreth 70% të kryebashkiakëve aktualë. I pari që s’e ka vendin e sigurt është Dritan Leli i Vlorës.
Krisja mes tij dhe kryeministrit ka ndodhur prej kohësh dhe kulmi u arrit në zgjedhjet e përgjithshme të 2021-it. Rama i kërkoi Lelit që të pozicionohej si kandidat për deputet, në rend emëror në listën jo fituese. Por ai nuk pranoi dhe zgjodhi të jetë në drejtimin e qytetit të Vlorës. Kjo nuk u “përtyp” lehtë nga kryeministri, i cili, ka refuzuar takimet dhe aktivitetet me të në mënyrë sistematike dhe përplasjet mediatike kanë qenë të shpeshta. Kavaja është një nga qytetet që nuk dihet nëse do të drejtohet nga kryebashkiaku aktual Redjan Krali. Kjo për disa arsye.
E para ka të bëjë me shpalljen e bashkisë së këtij qyteti si në prag falimenti për shkak të keqmenaxhimit të fondeve dhe e dyta, me disa prej premtimeve të pa mbajtura. Kryebashkiaku aktual erdhi me premtimin që do të ndërtojë një stadium për qytetin, aq i dashur për kavajasit, por ekipi i futbollit, luan në fushë neutrale për shkak të mungesës së një impianti. Thirrja disa herë në SPAK e Kralit, pyetur nga hetuesit e strukturës së posaçme, mbi disa tendera, kanë vendosur dukshëm në dyshim rikandidimin e tij. Gjithashtu edhe premtimi për ujë të pijshëm 24 orë në ditë, nuk është mbajtur, edhe pse qeveria ka alokuar buxhetin përkatës. Kamza nuk dihet nëse do i besohet sërish Rakip Sulit. Shembja e disa shkollave në këtë qytet, mosmbajtja e premtimeve për kanalet vaditëse, shtrimet e segmenteve të caktuara rrugore, por edhe sjellja në mënyrë arrogante me qytetarët, janë arsyet që kryeministri dhe kryesia e PS, janë duke menduar për pozicionimin e tij. Librazhdi s’e ka të sigurt qytetarin e parë.
Një nga shkaqet është mjegullnaja e krijuar për formularin e dekriminalizimit. Dyshohet se Gurra ka falsifikuar në vitet 2007-2008 vulën e Drejtorit të Ujësjellësit në Librazhd. Por e dyta, ka të bëjë edhe me ndryshimin e drejtuesit politik të qarqeve. Më herët në Qarkun e Elbasanit, drejtues ishte Taulant Balla, i pozicionuar tanimë në Fier, ndërsa aktualisht, drejtues është numri dy i PS, Damian Gjiknuri. Mendohet se ky i fundit mund të vendosë një kandidat tjetër bashkie në këtë qytet, edhe pas takimit që ambasadorja Yuri Kim bëri me përfaqësuesit e politikës shqiptare, ku i kërkoi pastërti në figurën e kandidatëve si për kryetarë bashkish, por edhe në këshillat bashkiakë.
Liman Morina në Bashkinë e Hasit s’e ka të sigurt rikandidimin. Vendimi sipas burimeve nuk ka të bëjë me premtimet e pa mbajtura apo me punët e pa realizuara në këtë bashki në verilindje të vendit, por për rifreskim, pasi ai ndodhet në krye të bashkisë prej 3 mandatesh. Kryebashkiakët aktualë në bashkitë e tjera të vendit pritet të rikonfirmohen. Jo se baza e partisë është e kënaqur me shumicën e punëve të kryera prej tyre, por këto zgjedhje do të shërbejnë si një mundësi e re dhe një test, për të treguar nëse janë të duhurit ose jo për të përfaqësuar logon e Partisë Socialiste dhe për t’u shpallur sërish fitues, edhe në ato bastione të konsideruara tradicionalisht të djathta
Shenim: *Ky është artikull ekskluziv i Gazeta Telegram, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Gazeta Telegram”
