Më 9 tetor të vitit 2018, qeveria vendosi të mbyllë të gjithë aktivitetin e lojërave të fatit. “Duke nisur nga data 31 dhjetor të këtij viti do të pushojnë së funksionari të gjitha kazinotë elektronike. Ndryshimi i sotëm përfshin edhe bastet sportive, si dhe çdo lloj basti për çdo garë të ashtuquajtur në pistë, me kuaj, me qen, apo me çdo lloj skllavi të faunës shqiptare. Nga 1 janari qeveria nuk do të japë licenca të reja për këto aktivitete. Në territorin e Republikës së Shqipërisë nga 1 janari nuk do ngrihet më asnjë qepen për baste,” u dëgjua të thoshte Rama 5 vite më parë duke ngrysur kështu një sërë vetullash të biznesmenëve apo dhe përdoruesve.
Por ligji i ri që propozon qeveria Rama e rikthen fuqishëm fenomenin e kumarit, në përmasa më të mëdha se ç’ishte më parë.
Edhe pse nuk e pranon hapur, Rama është në dijeni të dështimit të masave ekstreme që mori nga 1 Janari i vitit 2019, por justifikohet kur thotë se ky fenomen nuk është ndalur as në Kinë.
Duke i hequr si hero në të mirë të vendit, kreu i qeverisë renditi atëherë një sërë arsyesh se pse duheshin mbyllur pikat e basteve.
“Industria i ka dhënë një hapësirë të pajustifikueshme një pjese njerëzish që janë drejtpërdrejt të lidhur me krimin e organizuar dhe një pjesë e konsiderueshme e pronarëve të këtyre kompanive janë njerëz që kanë kaluar përmes burgjeve, plagosjeve, pengmarrjeve dhe shfrytëzimit të prostitucionit e kështu me radhë” shprehej kryeministri.
Ndërsa tani fjalët që përdor përpara publikut si arsye për t’i hapur janë ato të marrjes së këtij aktiviteti nga duart e ekonomisë së zezë.
Ligji i ri parashikon që personat që do të marrin licensat duhet të kenë dëshmi të pastër penaliteti. Përveç kësaj ata duhet të kenë eksperiencë jo më pak se 3 vjet dhe në disa vende të Bashkimit Europian.
Problemi qëndron në faktin se kush do ta ndalë krimin të vazhdojë të përfshihet në këtë biznes, përderisa shteti dilka përherë i humbur në këtë arenë, siç e pranon vetë kryeministri.
Rama gjithashtu e shihte si plagë të shoqërisë shqiptare, dhe se me veprimin heroik të tij, Rama po i kthente grave dhe fëmijëve, burrat e baballarët në shtëpi për të shpenzuar më shumë kohë me ta.
“Në datë 31 Dhjetor (2018), nënat, gratë dhe vajzat do të marrin mbrapsht djalin apo burrin e sëmurë nga bixhozi” tha ai.
Problemi është se me ligjin e ri, bastet sportive janë shumë herë më pranë lojtarit. Nëse dikur, një lojtar duhej të dilte nga shtëpia për të paguar skedinën në pikën e basteve, me ligjin e ri do t’i mjaftojë smarphone që ka në duar. Pasi ke shkarkuar aplikacionin në celular në çdo moment, kudo që të jesh, mund të vendosësh bastin.
