Sot mediat na zgjuan me një lajm disi jo të zakontë. Kryeministri Edi Rama ishte shtruar me urgjencë në spital për t’u operuar.
Në orët e para të mëngjesit, Rama u shtrua me urgjencë në QSUT dhe ishte në duart të mjekëve për të hequr apandesitin.
Pas ndërhyrjes mjekët deklaruan se operacioni shkoi me sukses dhe se kreu i qeverisë ndodhet në gjendje të stabilizuar shëndetësore.
Arben Gjata, shef i Shërbimit të Kirurgjisë në QSUT theksoi se Rama mund të ecte me këmbët e veta që sot. Por shtoi se do i duhen të paktën 2-3 ditë që të rikuperohet, kështu që për 3 ditë nuk do ta shohim të bëjë fushatë.
Vëmendja e aktualitetit politik u zhvendos ditën e sotme komplet në QSUT, ku kreu i qeverisë vizitohej nga familjarë, zyrtarë vendas e të huaj. Pra, fushata elektorale për zgjedhjet e 14 Majit doli disi në plan të dytë.
Ajo që binte në sy menjëherë ishte siguria në spitalin Nënë Tereza, e cila ishte në nivelin më të lartë historik ndonjëherë në atë qendër spitalore.
Uniformat blu ndodheshin kudo për të ruajtur kreun e qeverisë.
Burime për Telegram bëjnë me dije se diagnoza e saktë e kryeministirt është apandesit gangrenoz. Ndërhyrja u bë me laparoskopi, që është në një vrimë të vogël në bark. Ndërkohë të njëjtat burime shtojnë se deri nesër në mëngjes, ai do të rrijë në spital si pjesë e protokollit.
Për momentin, kryeministri vazhdon të mbahet nën vëzhgim në reaminacion, ndërsa mjekët presin të vënë në pah më shumë informacione rreth shëndetit të tij.
Gazeta Telegram i uron shërim të shpejtë e të plotë kryeministrit Edi Rama pas kësaj ndërhyrje.
