Kjo javë u mbyll me një shije jo të mirë nga hidhërimi që la një mori aksidentesh në vend që kulmoi me përplasjen fluturimthi të një automjeti në një nga zonat më me shumë lëvizje në kryeqytet. Një makinë luksoze “Audi” me 200 km/h përshkoi rrugën që vjen nga Farka për në rrethrrotullimin e Saukut dhe bie nga mbikalimi. Statistikat të frikshme: 3 të rinj jo më shumë se 23 vjeç të vdekur dhe 2 persona të plagosur.
Të nesërmen bilanci u rrit me një vdekje në Durrës, një në Divjakë, një tjetër në Kavajë e kështu me radhë. Megjithatë vëmendjen më të madhe e mori sigurisht aksidenti i mbikalimit të Saukut, kjo dhe për mënyrën se si ndodhi gjithçka.
Një aksident i cili në një farë mënyrë ishte një “tragjedi” e paralajmëruar. Kjo dukej dhe nga postimet që bënte 20-vjeçari që drejtonte automjetin luksoz në momentin që ndodhi ngjarja e kobshme.
“Mos kini frikë kur e mbaj timonin me një dorë, kini frikë kur i vendos të dyja duart,” shkruante në TikTok i riu për të treguar se tejkalonte shpejtësitë e lejuara pa iu dridhur qerpiku. Në 1 vit i pajisur me patentë, 5 herë i gjobitur nga policia. E megjithatë “spektakli” në TikTok vazhdonte, me ngarje makine që arrinte deri në 270 km/h. A nuk janë të mjaftueshme këto pamje për të shtyrë policinë që të ndalojë një person që përbën rrezik për sigurinë e qytetarëve.
Ashtu si Tik Tok shërben si vitrinë për kënaqjen e syve të publikut për arritjet e kilometrazhit të këtyre të rinjve, ky rrjet social mund t’i hyjë në punë dhe autoriteteve për të gjurmuar e ndaluar adoleshentët problematike.
Nga pamjet që u bënë publike të siguruara nga kamerat e sigurisë, dukej qartë se si makina në mbikalim shpëtoi për mrekulli në fraksion sekondi duke kaluar pak përpara se Audi të binte nga mbikalimi. Por të njëjtin fat nuk e kishte automjeti që po kalonte në aksin që të çon në Elbasan. Burrë e grua në qetësinë e tyre gjenden përballë një automjeti që i bie nga qielli m’u mbi makinën e tyre.
Mjaftoi ky aksident që rrjeti të mbushej me “trima” që ngasin automjetet e tyre me shpejtësi skëterrë duke u kthyer në një farë mënyre në kamikazë për shoqërinë.
Gjenezën ky problem e ka tek edukimi që marrin këta adoleshentë apo të rinj që mësohen me makina luksoze pa punuar asnjë ditë në jetën e tyre e mendojnë se kanë në dorë gjithçka e mund të sillen si të duan.
A nuk e mendojnë dy herë prindërit e tyre se çfarë “arme” po lënë në duart e fëmijëve? A nuk e kanë frikën se fëmijët e tyre do të kthehen gjallë në shtëpi apo jo?
Plotësimi i dëshirave të fëmijëve e ka një kufi, por ajo çfarë është e rëndësishme është edukimi që duket se ka boshllëk të madh në mentalitetin e prindërve shqiptarë “me lekë”.
Shenim: *Ky është artikull ekskluziv i Gazeta Telegram, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Gazeta Telegram”
