Pavarësisht se vazhdimisht shifrat tregojnë çdo vit rritje të ekonomisë, të rinjtë shqiptarë nuk po marrin asnjë efekt pozitiv. Emigracioni shihet si mënyra më optimiste për të bërë përpara, pasi tregu shqiptar i punës dhe arsimimi tregojnë vetëm përkeqësim.
Raporti i fundit i INSTAT mbi mirëqenien e të rinjvë në vitin 2021 tregon se 32% e 20-vjeçarëve nuk janë as në shkollë, as në punë. Gati një e treta e grupmoshës 20-24 vjeç nuk bën asgjë për formimin profesional, qoftë nga arsimi, qoftë nga tregu i punës.
Dihet se situata e të rinjve sot do të reflektohet në të ardhmen në shoqërinë tonë. Synimet për t’u larguar nga vendi po i mbajnë të rinjtë larg shkollës dhe tregut të punës, teksa shifrat tregojnë edhe për një braktisje të lartë të arsimit bazë.
Këto shifra padyshim janë të frikshme dhe të dhimbshme, pasi praktikisht më shumë se një e treta e të rinjve të moshës 20-24 vjeç nuk janë efektivë. Me siguri pjesa më e madhe e tyre po presin rrugën e radhës me gomone drejt Anglisë.
Largimi i të rinjve nga Shqipëria është një fenomen i cili ka ndikuar thellësisht në shoqërinë shqiptare. Në vitet e fundit, emigrimi i të rinjve është bërë më i ndjeshëm, me një numër të madh të të rinjve që po largohen nga Shqipëria për t’u vendosur në vende të ndryshme të Europës dhe të botës.
Ky largim i të rinjve ka pasoja të ndryshme për shoqërinë shqiptare, duke përfshirë humbjen e potencialit njerëzor, rënien e nivelit të arsimimit dhe cilësisë së punës, dhe zvogëlimin e numrit të njerëzve të aftë për të ndërtuar një shoqëri më të zhvilluar dhe prosperuese.
