“Nuk dua të mbahem mend si kryebashkiaku që betonizoi Tiranën, por si kryebashkiaku që mbolli sa më shumë pemë në kryeqytet”. Me këtë slogan i nisi premtimet e fushatave për kryesinë e bashkisë Tiranë, Erion Veliaj.
Por statistikat sot teksa ai garon për mandatin e tretë, tregojnë të kundërtën. Në fushatën elektorale kur kërkonte mandatin e parë në rrugët e kryeqytetit, kryebashkiaku, Erion Veliaj, zotohej se nuk do të jepte asnjë leje ndërtimi dhe se do të mbahej mend si Kryebashkiaku që do t’i shtonte më shumë parqe dhe gjelbërim kryeqytetit.
Ndryshe nga çfarë premtoi në 2015-ën, si në mandatin e parë ashtu edhe në të dytin të cilin e mori pa konkurent, Erion Veliaj po e mbyll mes akuzave për betonizimin e Tiranës dhe si kryebashkiaku që ka dhënë më shumë leje ndërtimi.
Por ndërtimet në Tiranë parashikohen të rriten edhe gjatë viteve të ardhshme dhe kjo gjë vihet re në projektbuxhetin e Bashkisë së Tiranës.
Sipas dokumentit, Bashkia Tiranë parashikoi që për vitin 2023 nga taksa e ndërtimeve të reja të arkëtojë, 5.5 miliardë lekë, ose 759 milionë lekë më shumë se viti 2022. Rritja parashikohet të vijojë edhe gjatë viteve 2024 dhe 2025 me 6.1 miliardë lekë.
Ky trend rritjeje i të ardhurave nga kjo taksë, ndryshe përkthehet edhe në rritje të ndërtimeve në kryeqytet. Betonizimit të Tiranës edhe për vitet e ardhshme, i parapriu dhe vendimi i Këshillit Kombëtar të Territorit, ku në korrik të këtij viti ka miratuar leje për 12 kulla të reja në Tiranë.
Rekordi u shënua në tremujorin e parë 2022, kur u dhanë leje për një sipërfaqe prej 800 mijë metrash katror, duke u përgjysmuar në të dytin (388 mijë m2) dhe duke u reduktuar ndjeshëm në të tretin (272 mijë m2). Në tremujorin e katër, sipërfaqja e dhënë u rrit sërish dhe arriti në rreth 350 mijë metra katror.
