Zgjedhjet/ Kavaja “shpresa” e Berishës, gara e hapur mes dy kandidatëve Krali e Qosja

Kavaja ka qenë gjithmonë një bastion i Partisë Demokratike, me ish-kryeministrin Berisha që ka kandiduar disa herë si deputet i këtij qyteti, që i sillte mijëra vota demokratëve. Në vitin 2007, kandidati demokrat Refik Rrugeja fitoi zgjedhjet me një rezultat të pabesueshëm prej 84% të votave. Por katër vite më vonë, Elvis Rroshi, bën kthesën e madhe duke i surprizuar të gjithë dhe duke mposhtur Rrugenë me 54% të votave.

Roshi, i cili më vonë u bë sinonim i politikës së kriminalizimit të politikës në Shqipëri, fitoi me lehtësi një mandat të dytë më 2015, kur, në bashkinë e Kavajës, tashmë të shtuar me ish-komunat Synej, Luz i Vogël Golem dhe Helmas, mposhti kandidatin demokrat me 62% të votave. Ky mandate i dytë nuk do të zgjaste shumë, pasi Rroshi u shkarkua dhe në 2017, Kavajën e fituan sërish demokratët me një rezultat fare të ngushtë.

Socialistët e rimorën bashkinë Kavajë në zgjedhjet pa garë të vitit 2019, por numri i votave që ata arritën të mobilizonin në ato zgjedhje nuk ishte shumë i lartë, vetëm 7500. Ndërsa në zgjedhjet e përgjithshme të vitit 2021, në territorin e Bashkisë Kavajë socialistët dhe aleatët e tyre aktualë socialdemokratë, morën rreth 10,700 vota, rreth 500 më pak se sa kundërshtarët e tyre, Partia Demokratike dhe Lëvizja Socialiste për Integrim, të marra së bashku. Numri i votuesve në Bashkinë e Kavajës ka njohur sistematikisht rritje, duke reflektuar rritjen e popullsisë në regjistrin civil.

Në vitin 2007, në territorin e bashkisë aktuale kishte 50 mijë votues në lista ndërsa më 2011, numri i votuesve arriti në mbi 66 mijë. Përkundrejt kësaj, numri i votuesve ka rënë, nga 27 mijë më 2011, në 23 mijë më 2021.

Banorët e Kavajës do të zgjedhin mes kryebashkiakut aktual Redjan Krali, i Partisë Socialiste dhe kandidatit të koalicionit opozitar Bashkë Fitojmë Fisnik Qosja. Në garë për 31 ndenjëset e këshillit bashkiak njëmbëdhjetë parti, në listat e mbyllura të së cilave gjenden 352 emra kandidatësh. Gara pritet të jetë e hapur për të dy kandidatët, me demokratët pak më të favorizuar për shkak të historikut të Kavajës dhe lidhjes që ato kanë me të djathtët.